جیمز جویس و سیرادانلیق

قونو اینسان‌دیر

(جیمز جویس و سیرادانلیق)

جیمز جویس، یولیسیز باشلیقلی رومانیندا بیر اینسانین گونده‌لیک یاشامینی گولونج غریب و پارودیک اولاراق عینی حالدا بوتونلوکله گرچک نه‌دن‌لر و اولایلارا دایاناراق هومئرین آنلاتدیغی اودیسهنین ترووا ساواشیندان سونرا اون ایل ایچینده (تانری‌لار وریندن) باشینا آچیلان اولایلارا باغلاییر. یانی ییرمینجی یوزایل‌ده (1904 ـ ژوئن‌ین 16سی) یاشایان 38 یاشلی آدامین بیرگونلوک یاشامینی صوبح دوروب قلیان‌آلتی یئدیییندن گئجه‌یاریسی آرغین یورغون ائوه دؤندویونه قدر اولوب بیتن اولایلاری (و دوشونجه‌لرینی) آنلاتاراق اودیسه‌نین اون ایللیک ماجراسی ایله قوشالاشدیریر. اودیسه عصیرلر اوزریندن کئچیب الیمیزده اولان پری‌لر دئولر و ایلاهه‌لرله باشباشا قالمیش اوسطوره‌دیر؛ لئوپولد بلوم آنجاق نورمال بیر اینسان.

جویس دوغاچی توصیف‌لرله یاراتدیغی کاراکتئرین یاشامینا یاناشیب، باشینا گلن بوتون اولایلارین خیردالیقلاری و حتی دوشوندوکلرینه قدر بؤیوتج قویاراق ایزله‌ییجی‌نین قاباغینا بلیرلی بیر اینسان قویموش. لئوپولد بلوم (بیر گونده) نه ائدیب دوشونسه، یارادیجیسینین گؤزونون بیر اوجو اودیسه و ماجرالارینادیر.

بیرگونلوک اؤنمسیز گوندم اولایلاری اون‌ایللیک ائپیک ماجرالارا باغلاماق نه قدر داهییانه عینی حالدا گولونج و غریب اولسا دا، بئله بیر توتومون ایچینده اؤنملی مسأله واراولمالی‌دیر. مشهور باغلاردان بیری، لئوپولد بلوم ایله اودیسه، بیری دوبلینده اوبیریسی ایسه دنیزلری و اسکی یونان شهرلرینی بوتون ماجرالاری ایله گزینیب دولانارکن ائوده قالمیش ائش‌لری‌دیر: اودیسه‌نین ائشی پئنئلوپئ، اودیسه‌نین دؤنمه‌یه‌جه‌یینه اینانیب سارایینا هجوم ائدن ائلچی‌لری ایله اوغراشمالی‌دیر؛ پئنئلوپئ ایللر بویو توخو توخوماقلا اؤزونو ائلچیلرین الیندن قوتاریب ائشینه وفالی قالیر. مالی، لئوپولد بلومون ائشی، بلوم دوبلینده گزینرکن باشقا بیری ایله گؤروشوب ارینه خیانت ائدیر، گئجه‌یاریسیندان سونرا بلوم صوبحه یاخین ائشینین یانیندا یوخویا دالار دالماز، مالی اوزون‌اوزادی خیال‌یورویوشو ایله خیانت تئمالی لذت‌دولو چئشیتلی فانتئزی‌لر توخویوب دورور. پئنئلوپی‌نین توخو توخوماسی ایله خیانت‌دن قوتولماسی مالی‌نین خیانت‌له ایلگیلی خیال توخوماسی اؤرنک باغلاردان بیری‌دیر.

دوبلین کیمی قوجامان بیر شهرین ایچینده هر کیم اولابیله‌جک قدر سیردان بیر آدامین قارماقاریشیق دوشونجه‌لری ایله دولامباج ووروب ایکی قیران قاراپول ایچین چابالاماسینی، تاریخ بویو قالارغی و دَستانسی اولایلار آنیمساماسی ایله آنلاتماسی نه آنلام داشییابیلر؟ بئله بیر چابا هاردان قایناقلانیر؟ گرچکچی آچی ایله یاشامین وازکئچیلمز آنلارینی ائپیک آرغاجلا سیخیشدیریب معظم دونیا یاراتماقدا، جویس باشقا بوتون آماجلاری یانیندا اینسانی و شاید ده اخلاقی بیر آماج آردیندادیر.

جویس سیرادانلیغا اؤنم وئریر. روماندا سیرادان بیر اینسانین یاشامینی اوسطوره‌وی قهرمان قدر تاریخ بویو قالارغی ائدیر. قوردوغو حیماسه‌سینی اسکی یونان اوسطوره‌لرینه باغلاسا دا قهرمانلیق ائیلم‌لرله دئییل گونده‌لیک اؤنمسیزجه خیریم‌خیردا ایشلرله ائدیر. جویس هر بیرئیین یاشامینی اوسطوره‌وی کاراکتئر قدر اؤنملی بیلیر. بو اوزدن جویس بوتون تاریخ بویو مکمل بیر قهرمان اولاراق اودیسه و اونون ماجرالارینی سیمگه‌سل بزک کیمی بیر آدامین گونده‌لیک یاشامینی آنلاتماقدا قوللانیر و سیرادانلیقدان دَستانسی حیکایه یارادیر.

لئوپولد بلوم بیر بیرئی اولاراق بوتون اینسانلیق دونیاسیندان سئچیلمیش اؤرنک‌دیر. اینسان دونیاسینا بئله اینجه باخیشلا یاناشماق، یاشامین بوتون پارچالارینا اؤزَنیب اؤنم وئریب قایغیسیندا قالماقدان قایناقلانیر. جیمز جویس یاراتدیغی یولیسیز دونیاسیندا قونو، قاچیرتدیغی یئل‌دن توت یاشام ایچین چالیشیب پول قازانماقدان هابئله سئوگی ایله اینسانلیق قاورامیندان دانیشماغا قدر، اینسان‌دیر.