- جیمز جویس و سیرادانلیق
- کیتاب اینجهلمهسی / شریف مردی: آینادا اؤل-دیریلمک / زامان پاشا زاده
- اومسوقدا قارا میزاح
- «قیش» شعرینده بیچیم و ایچریک
- مجموعه مقاله «داغیتماغا دوغرو» منتشر شد!
- «داغیتماغا دوغرو» کیتابیندا گلن اؤن سؤز
- داغیتماغا دوغرو
- تورپاق ـ چنگیز آیتماتوو
- جان آپدایکین یاپیسال اینجهلمه یازماق اوچون آلتی قورالی:
- کیتاب اینجهلمهسی / شریف مردی: قوشلار داها قورخمورلار / رقیه کبیری
آخرین مطالب
امکانات وب
اؤن‌سؤز
ادبی ساحه‌ده یازیب یاراتماق منه هرنه‌دن اوستون اولموش، نه ایسه ادبیاتیمیز اوزره بیرپارا مقاله و باخیشلاریم اولدو آرا سیرا؛ بعضن درگی‌لرده یوخسا اینتئرنئت اوزره ده یاییلدی. بونلاری بیر ده گؤزدن کئچیریب بیریئره ییغیب کیتاب اولاراق یایماسینا فیکیرله‌شدیم. یازیلارین چوخو اؤیکو اوزه‌رینه یازیلمیش‌دیر. بونلاری آنجاق یایماقلا تنقیدین گؤره‌وینی یئرینه یئتریمک دئییل‌دیر آماجیم. بونا دا اینانیرام کی تنقید یالنیز اثری چؤزمک یوخسا اؤزل قونو آچیسیندان یا بیر ایدئولوژی گؤزلویوندن اثره یاناشماق دئییل‌دیر. نه ایسه بونلار دا منتقدین ایشی‌دیر سونوندا. مقاله‌لردن بعضی‌لری اؤزل قورام اوزره یازیلمیش، اونلارین گره‌یینجه آچیقلاماسی گرک ایدی آنجاق اولمادی و باشقا بیر مقاما تاپشیریلدی. کیتابی چوخلو بیر توپلو کیمی نظره آلمیشام. بو اوزدن داغینیق قونولار گؤرونسه ده بیر بیتوولویو داشیماقدادیر اؤزونده.
کیتابدا گئدن مقاله‌لری اوچ بؤلومه بؤله‌بیلَرم: بیری‌لری یالنیز تنقیدین گؤره‌وی و سوره‌جی اوزره یازیلمیش، بعضی‌لری رومان یوخسا اؤیکو توپلوسونا (بیر کیتابین بوتونلویونه)، و بیر پایی دا یالنیز اؤزل بیر اؤیکو یوخسا اؤیکوجوک اوزره.
بیرینجی و ایکینجی مقاله، تنقیدین ایشله‌وی، گؤره‌وی و آماجی اوزره یازیلمیش، تاریخ بویو ادبی تنقیدین سوره‌جینه باخاراق اونون اثرلره توخونارکن دیرلندیرمه‌سیندن بویون قاچیرماماسینی وورغولامیش‌دیر. یئری گلمیشکن وورغولاماسی پیس اولماز: بیر منتقد اثره یاناشدیغیندا یالنیز چؤزومله‌ییجی دئییل، اثری چؤزَرکن دَیرله‌ندیره ده بیلر. آرتیق چرچیوه اوزره دارتیشابیلن منتقد سون نظرینی دئمه‌یه داها حاقلی‌دیر. بو ایکی مقاله بیربیرینی تکمیل ائدیر و اصلینده بیر قاورامین بویونا بیچیلمیش ایکی دون‌دور.
اوچونجو مقاله، چوخ‌سسلیلیک؛ رومان؛ بیز باشلیغی ایله چوخ‌سسلی رومان و اونون یارانیش زمینه‌سینه توخوناراق، بیزده بئله‌بیر رومانین ایزینی آراییب دورور. بیز دئدیییم‌ده ایران آذربایجانینی آماجلاییرام. رومانین یازیلما یوخسا یازیلماما نه‌دن‌لرینی آراییب سونوندا «بیزده او معنادا رومان یوخدور» سونوجونا یئتیشیرم.
اوسته سایدیغیم اوچ مقاله وورغولادیغیم ایلک بؤلومون ایچینه سیغابیلر؛ آنجاق بونلاردان سونرا گلن دؤرد مقاله، دؤرد آیری آیری کیتابین بوتونلویونه حصر اولموشدور. بو دؤرد مقاله ده ایکینجی بؤلومون ایچینده اولمالی. اؤیکوجوک باشلیقلی مقاله ایسه اؤیکوجوک ژانرینا توخوناراق، اؤزل بیر اؤیکوجویو چؤزوب اؤزللیک‌لرینه توخونور. بو مقاله و کیتابین قالان مقاله‌لری یالنیز بیر اثری چؤزه‌رک بعضی آچیلاردان (اؤرنه‌یین پسیکولوژی و فئمئنیسم ادبی تنقید قوراملاری) اونلارا یاناشیر.
مقاله‌لرین یازماسیندا چالیشمیشام گئورک لوکاچ‌ین روح و فورم کیتابیندا گلن مقاله‌نین نه‌لییی و فورمو باشلیقلی یازیسیندا آنلاتدیغی «آرا»نی ساخلایام؛ چوخ یاخینلاشماقلا قونو اوقدر بؤیویور کی اوندان باشقاسینی گؤرمور چاشیریق، چوخ اوزاقلاشاندا دا بلکه بعضی اؤزللیک‌لری گؤزدن آلیر یئنه چاشیریق. هر حالدا بو کیتابی درین سایغی و سئوگی‌لرله، ایچینده اولان یالنیشلیق‌لاری باغیشلاییب، وورغولاماق اوماری ایله بو یولدا منه یاردیم اولانلارا و بوتون اوخوجولارا سونورام.
قوم ـ پاییز ـ 1395
شریف مردی
ما را در سایت سانسور اولموش.. دنبال می کنید
برچسب : نویسنده : msharifmardig بازدید : 119