اعترافلار 5

آتام چوخ دینچی آدامدی. دولاییسی ایله ده چوخ ساده و قلبینده اولان دیلیندن چیخاندیر. دوغروسو قوما کؤچه‌ندن سونرا دین رنگی داها قاتیلاشدی، اؤنجه‌لرینی گؤرمه‌میشم، یا گؤرسم هئچ می هئچ یادیمدا دئییل (کؤچدویوموزده من یئددینی یاشاییردیم). جاوانلیغیندا، یا ان آزی قوما کؤچمه‌میشدن قاباق او قدر ده سیخ باغلی دئییلمیش دینی قونولارا. یالنیز سیرادان بیر دیندار ایمیش، ائشیتدیکلریمه گؤره.

تربیتیمیز داها چوخ مدرسه‌لرده اولدو، دیلدن باشقا؛ دیلی (تورکجه‌می) کندیمیزده، آنامدان، و بؤیوک‌لریمدن اؤیرندیم. فارسجانی ایسه اؤیرتمن‌لردن و کوچه باییردا گؤروب اوغراشدیغیم اوشاقلاردان اؤیرندیم. تورکجه‌نین تملی کندیمیزده تماملی ایله قویولموشدو؛ کؤچدویوموز زامان رادیو بئله اوقدر دینله‌نیلمیردی؛ فارسجا ایسه بیرینجی ایل اوخولدان باشلاندی.

تورکجه‌م یئددی یاشیما قدر ائوده، آنامدان و باشقا بؤیوکلریمدن اؤیرندیییمه گؤره آرینمیش و ترتمیز بیر دیلدی؛ کؤتو سؤزلردن پاییم یالنیز آنامدان منه یا باشقا باجی قارداشلاریما دئدیییی سؤزلردی. «کول باشووا»، «آلا با»، «خاکی قودوخ»، «کاس»، «خای» ... کیمی سؤزلر مثلن. فارسجام دا اؤیله. ائو اوشاغی اولدوغوما گؤره، یالنیز اوخولدان ائوه و ائودن اوخولا گئت گلده‌یدیم اون‌بئشه قدر. اؤیرتمن‌لر و اوخول حیه‌طینده اوشاقلار دانیشان دیلی اؤیره‌نیردیم. فارسجا سؤیوشلر و کؤتو سؤزلردن پاییمم تورکجه‌مدن داها چوخدور البته. هله ده اؤیله‌دیر.

ایلدن ایله دیرچه‌لینجه اوخولدا دین و دینی اؤیره‌تیملر قاباریق شکیلده یوغونلاشیردی. بئشی اوخویاندا ائوده ناماز قیلماز آنجاق مدرسه‌ده اوچ یوز نفره ایمام اولاردیم ناهار نامازیندا. اؤیره‌تمن‌لر سس‌سیزلیییمی نزاکتیمی، دیلسیزلیییمی، دیلیمین تمیزلییینی گؤرونجه منی ایمام سئچمیشدیلر، اؤزلرینه بئله. من ایسه دست‌نمازسیز کئچیب قاباغا دؤرد یوزه یاخین (اؤیر‌ه‌تمن‌لر داخیل) آداما ایمام اولاردیم. ائوده ایسه صوبح یوخسا آخشام نامازی دا هئچ قیلمازدیم.

ناماز احکامینی دوغرو دوزگون بیلَردیم اوشاقلیغیما رغمن. بیر گون، لاپ آیدین یادیمدا، قونوت توتماغی اونوتدوم؛ من قونوت توتمامیش اَییلدیم رکوعا، اوشاقلار آنجاق قونوتلارینی توتدولار، اؤزومو ایتیرمه‌دیم. بیلیردیم نه ائدم. رکوعو اوقدر اوزاتدیم کی اوشاقلار قونوتدان رکوعا کئچسینلر؛ نامازین داوامینی آپاردیم. بو ایسه پرورشی اؤیره‌تمنیمیزی داها سیخ منه اینانماغا یؤنه‌لتدی. او گوندن مدرسه‌نین مودیری، پرورشی اؤیره‌تمنیمیز کیمی، باشقا معلم‌لر ده منیم دالیمدا نامازا دوراردیلار. من ایسه دوغرو و غلیظ تلفظ ایله عربجه کلمه‌لری ایفاده ائدردیم. آلهم صلی علی محمد و آل محمد.